மாநகரின் மத்தியில் நிழற்சோலை விகாரமகாதேவி பூங்கா

கொழும்பு நகரின் மிகவும் பெரிய பூங்கா என்றே சொல்ல வேண்டும். மிகவும் பழமையான இந்தப் பூங்கா மியூசியத்திற்கு அண்மையில் கொழும்பு மாநகரின் நகர மண்டபத்திற்கு எதிர்ப்புறமாக இருக்கிறது.

Town hall Colombo

இலங்கையில் பிரிட்டிஸ்காரர் ஆட்சி செய்தபோது அமைக்கப்பட்டது இப் பூங்கா. விக்டோரியா இராணியின் ஆட்சிக்குப் பின் அவரின் பெயரால் விக்டோரியா பார்க் எனப் பெயர் சூட்டப்பட்டிருந்தது.

1950 பின் நாட்டில் எழுந்த தேசிய அலையின் பின் துட்டகைமுனுவின் தாயாரான விகாரமகாதேவியின் ஞாபகமாகப் பெயர் மாற்றம் செய்யப்பட்டுள்ளது.

துட்டகைமுனுவின் தாயாரான விஹாரமகாதேவிசிலை

கெளதம புத்தரின் மாபெரும் சிலையானது, முகப்பு வாயிலை நோக்கி உள்ளே அமைக்கப்பட்டுள்ளது.

கெளதம புத்தர்

நகரத்தில் இப்படி ஒரு சோலை வனமா என ஆச்சரியப்பட வைக்கும். பாரிய பெரிய மரங்கள் நிழல் பரப்பி குளிர்மை சேர்க்கின்றன.

கீதமிசைக்கும் குருவிகள்

பெரிய புளிய மரங்களில் பறவைக் கூட்டங்களும் வெளவால்களும் தமக்கு வீடமைத்து மகிழ்கின்றன.

தலைகீழாக சர்க்கஸ் காட்டுகிறார்கள்

பறவைகள் ஒலிக்கும் பாடல்களையும் வண்ணத்துப் பூச்சிகள் பறந்து திரிவதையும் அமைதியாக அமர்ந்திருந்து இன்புறலாம்.

கொழும்பு நகராட்சி மன்றத்தினாரால் மேற்பார்வை செய்யப்பட்டு மிகவும் சுத்தமாக அழகாகப் பேணப்படுகிறது. இந்த மரக் குகையின் வாசலில் மக்கள் நின்று படம் எடுத்துக்கொள்கின்றார்கள்.

மரத்துள் குகை

அழகான பூக்கும் தாவரங்கள் பலவும் இங்கிருக்கின்றன. அவசர யுகத்தில் அலறி அடித்து பறந்து திரியும் மக்கள் சற்று மன ஓய்விற்காக இங்கு வந்து அமர்ந்து இயற்கையை இரசித்து அனுபவிக்கின்றார்கள்.

பெரிய மரங்களின் கீழ் மக்கள் ஓய்வாக அமர்ந்திருக்க கூடியதாக பல இடங்களில் இருக்கைகள் அமைத்துச் சுத்தமாக பேணிக்காக்கிறார்கள்.

தூக்கமும் கண்களைத் தழுவட்டுமே..

காலை எட்டு முதல் மாலை 6 வரை பார்வையாளர்களுக்கு திறந்து வைக்கப்படுகிறது. பூங்காவில் உள் நுழைந்து இலவசமாகச் சென்று பொழுதைக் கழித்து வரலாம்.

பலரும் உணவுப் பொதிகளுடன் குடும்பமாக வந்திருந்து அமர்ந்து உணவருந்தி மரநிழல்களின் கீழ் இளைப்பாறி துயின்று செல்கிறார்கள்.

வீட்டுக்காரியிடமிருந்து விடுதலை பூவுலகிலிருந்து அல்ல.

பூங்காவின் மத்தியில் ஒரு சிற்றுண்டிச் சாலையும் அமைக்கப்பட்டுள்ளது.

சிற்றுண்டடிச் சாலை

 உணவும் ஐஸ்கிறீம் குளிர்பானங்களும் கிடைக்கும். மதுபானங்களுக்கு இடமில்லை.

குதிரை வண்டிகளும் சவாரிக்குக் காத்திருக்கின்றன. ஆமையாரும் குதிரைகளுடன் ஓட்டப்போட்டி போட  தயாராக நிற்கின்றார்.

ஓட்டத்தில் போட்டி குதிரைக்கும் ஆமைக்கும்

சிறுவர் பூங்கா இதன் ஒரு பகுதியாக அமைந்துள்ளது. குழந்தைகள் ஓர்புறம் பந்தடித்து விளையாடுகிறார்கள். இட நெருக்கடியில் வாழும் மக்களுக்கு இப்படி ஒரு இடம் நகரின் மத்தியில் இருப்பது பெரும் வரப்பிரசாதம் என்றே கூறவேண்டும்.

"பொறு பொறு நான் நீலப் பந்து வாங்கி வாறேன்"

பூங்காவின் நடுவே சென்றுவர அழகான பாதைகள் அமைக்கபட்டுள்ளன. ஓரங்களில் மரச் செடிகள் அழகு சேர்த்து நிற்கின்றன.

உடல் நலம்பேண நடைப் பயிற்சி மேற்கொள்வோரும் ஒருபுறம் நடை பயில்கின்றார்கள்.

"கொலஸ்டரோலைக் குறைக்கட்டாம்"

பூங்காவின் உள் இடையிடையே செயற்கைக் குளங்கள் அமைத்துள்ளார்கள் அதிலிருந்து நீர் தெறித்து ஓடி அழகூட்டிக் கொண்டிருப்பதுடன் குளிர்ச்சியையும்  தருகின்றது.

மற்றொரு பெரும் தடாகமும் அதன் மேல் ஒரு தொங்கு பாலமும் அனைவரையும் கவர்ந்து இழுத்து நிற்கின்றது.

பூரணை நாளில் நடைபாதையின் இருபுறமும் மாலையில் அகல்விளக்குகள், மெழுகு விளக்குகள்  ஏற்றி புத்தபிரானை வணங்கித் துதிக்கிறார்கள்.

மியூசியக் காட்சியாக...

சிறுவர்களுக்காக இரயில் வண்டியும் முன்னர் இங்கு ஓடிக்கொண்டிருந்தது. இப்பொழுது பராமரிப்பின்றி நிற்கிறது. அது ஒன்றுதான் குறையாகத் தெரிகிறது.

குழந்தைகள் விளையாட ஊஞ்சல்கள், சீ சோக்கள், மோட்டார் கார்கள், பொம்மை மிருகங்கள் எனப் பலவும் புதிதாக அமைக்கப்பட்டு பல்வேறு வர்ணங்களில் கவர்ந்து நிற்கின்றன.

பூமரங்களின் மலர்க் காட்சியும் விற்பனைகளும் பொதுவாக வாரந்தோறும் நடைபெற்று வந்தன. இப்போது வேறு இடத்தில் நடைபெறுகின்றது.

வீதிப் போக்குவரத்து விதிமுறைகளைக் காட்டும் சமிக்கைக் பலகைகளுடன் பொம்மை வீதி அமைக்கப் பட்டிருக்கின்றது.

பூங்காவுக்குப் போனால் தும்பு முட்டாசு சாப்பிடாமல் இருக்க முடியுமா? தும்பு முட்டாய் வாங்கலையோ.... தும்பு முட்டாய்....

இங்கு வந்து இயற்கைக் காற்றை சுவாசித்து ஓய்வாக மரநிழலில் அமர்ந்து  சிற்றுண்டியும் கொறித்து இன்புற்ற  உங்களுக்கு தென்றலென இலைகளை அசைத்து  நன்றி கூறுகின்றன பசிய மரங்கள்.

பூங்காவுக்கு மீண்டும் செல்லலாம்.......

மாதேவி

0.0.0.0.0.

மாது கங்கையில் Madu ganga படகுச் சுற்றுலா

கொழும்பு காலி பிரதான வீதியில் பலப்பிட்டிய அமைந்திருக்கிறது. இங்குதான் இந் நதி ஓடிக் கடலுடன் கலக்கிறது.

Ahungalle அப்பால் அடர்ந்த காட்டின் ஊடாக மாது கங்கை பாய்கிறது. இலங்கையின் இரண்டாவது பெரிய ஈர நிலமாக இருக்கிறது.

கீரிப் பிள்ளை இனங்கள், 303 வரையான தாவர இனங்கள் இங்கு உள்ளதாகச் சொல்கிறார்கள். இவை 95 குடும்ப வகைகளைச் சார்ந்தவையாகும். 248 வகையான முதுகெலும்புடைய விலங்குகள் உள்ளனவாம்.

மீன் பிடிக் குடும்பங்களே பெரும்பாலும் வாழ்கின்றனர். ஆற்றில் மீன் இறால் பிடிப்பதையும் இரசித்துப் பார்க்கலாம்.

புதிய வகை இனங்களான நண்டு, மீன், இறால் இனங்கள் இங்கு இருக்கின்றன.

வெளிநாட்டினர் மிகவும் விரும்பி சுற்றுலா செல்லும் இடம் என்பதால் பல ஆடம்பர ஹோட்டல்கள் கங்கைக்கு அருகில் இருக்கின்றன.

கொழும்பிலிருந்து 75 கிலோ மீற்றர் தூரத்தில் இவ்விடம் உள்ளது. 2.45 மணிநேரத்தில் சென்றடையலாம்.  

மோட்டார் படகுகளில் நதியில் சவாரி சென்று பல அற்புதமான காட்சிகளைக் காணலாம். உல்லாசப் பயணிகளின் பரடைஸ் எனவும் அழைக்கிறார்கள். இரண்டு கிலோ மீற்றர் வரை படகில் சென்று இன்புற்று வரலாம். சுற்றிவர 25-30 தீவுகள் இருக்கின்றன. ஆழமற்ற ஆறு.  ஆழமான இடத்தில் 3 மீற்றர் தாளம் இருக்குமாம்.

நாங்கள் மோட்டார் படகு ஒன்றில் ஏறி ஆற்றில் பயணித்தோம்.
வெள்ளை நிறப் பறவைகள் சிறிய மரங்களில் கூட்டமாகக் கூடியிருந்து மகிழ்கின்றன. செட்டையடித்துப் பறந்து திரிந்து எம்மையும் மகிழ்வித்தன. பாலத்தின் கீழாக பயணித்தோம்.

 

பாம்புத் தீவு, ஐந்து சதத் தீவு (Satha pahe Dupatha>) பன்சலத் தீவு, நய் தீவு எனச் சில தீவுகளுக்கு பெயர்களும் உள்ளன. சத பக துவா மிகவும் சிறிய தீவு. பழைய காலத்தில் 5 சதத்திற்கு வாங்கியதாக வாய் மொழிக் கதைகள் உள்ளன. சிலர் நாணய வடிவில் இருப்பதால் அவ்வாறு அழைக்கப்படுகிறது என்கிறார்கள்.

இரண்டு முக்கிய தீவுகளில் நைடுவ Nai Duwa, மாடுவா பெரிய தீவு. இது 562 மீற்றர் நீளம் கொண்ட தீவு. தீவுகளின் கரையோரங்களில் செழித்து வளர்ந்திருக்கும் சதுப்பு நிலமரங்கள் நீர் அரிப்பினால் தீவுகள் அழியாமல் பாதுகாக்கின்றன.

Maduganga Kotdoowa Rajamaha Viharaya

தேவாலயத் தீவு 800 ஆண்டுகள் பழமையானது. கோத்டுவா ராஜமஹா விகாரை இந்த கங்காவில் அமைந்துள்ளது.

ஐந்து சததீவைத்தாண்டிப் பயணித்தோம். மிகவும் சிறிய தீவு கல்லாலான சிறிய ஒரு கட்டடம்  இருக்கின்றது. மரம் ஒன்று பரந்து விரிந்து கிளைகள் பரப்பி நிற்கின்றது அழகாக இருந்தது.

நீர்ப் பாம்பு ஒன்று நீரின் மேல் ஓடித் திரிந்து பயங்காட்டியது. இவற்றையெல்லாம் இரசித்த படியே படகில் சவாரி செய்கின்றோம். பாலத்தின் கீழால் படகு செல்கிறது.

இருபறமும் அடர்ந்த மரங்கள் வளர்ந்து நிற்க கிளைகளுக்குக் கீழாக பயணித்துச் செல்வது சொல்ல முடியாத இனிய அனுபவத்தை தந்தது.

இடையே திகில் பயணமும் தொடர்கின்றது. நீரில் கபரகொயாக்களும் ஓடித் திரிந்து பயங் காட்டின.

விகாரை தூரத்தே அழகாகக் காட்சி தருகின்றது. படகில் தொடர்ந்து விகாரையைத்தாண்டிப் பயணித்தோம்.

உயரமான மேடுகளில் வீடுகள் அமைத்து மக்கள் வசிக்கிறார்கள். பொதுவாக தனித்தனி வீடுகளாகவே இருப்பதைக் கண்டோம். உயரக் குன்றில் அமைந்துள்ள கறுவாப் பயிரிடப்பட்டிருந்த வீட்டிற்கு படகை செலுத்து நிறுத்தினார்கள்.

படகிலிருந்து மகிழ்ச்சியாக இறங்கினோம். மேட்டில் அழைத்துச் செல்லப்பட்டோம். கறுவா மரங்களினூடாக ஒற்றை அடிப்பாதையில் ஏறிச் சென்றோம்.


நாங்கள் சென்று பார்த்த வீடும் தனித்திருந்தது. வீட்டைச் சுற்றிலும் நீர் ஓடிக் கொண்டிருக்கிறது. அடுத்த வீட்டுக்குச் செல்வதாக இருந்தாலும் படகை வலித்தே செல்லவேண்டும். பக்கத்து வீட்டார் தொல்லையிலிருந்து விடுதலை நேரம் கெட்ட வேளை அழைப்பு மணிகேட்காது.

ஓவ்வொரு வீட்டிலும் ஒரு படகு வைத்துள்ளார்கள். தாங்களே வலித்துச் சென்று மாதாந்திரத்திற்கு தேவையான பொருட்களை வாங்கி வருவதாகச் சொன்னார்கள்.

குடிசை வீடுதான். ஒரு கொட்டிலும் ஒரு அறையும் சாய்வாகத் திறந்த சமையலறையும் இருந்தது.

கொட்டிலில்; வெட்டிய கறுவா மரங்களை பரப்பி வைத்திருந்தார்கள் கத்தியால் கீறிக் காட்டினார்கள். வெயிலில் காய வைத்த துண்டங்கள் காயக்காய சுருண்டு வரும். ஓரளவு காய்ந்த துண்டங்களை கொட்டில் கூரையில் மேலே செருகி வைத்து நன்கு காயவிட்டிருப்பதைக் கண்டோம்.
கறுவா மரங்களையும் சென்று காட்டினார்கள். விற்பனைக்கு பைக்கற்களில் கறுவாக்களை வைத்திருந்தார்கள். கறுவாப் பொடியும், கறுவா எண்ணெயும் கிடைக்கின்றன. நாங்களும் இரண்டு இரண்டு பைக்கற்றுகள் வாங்கி வந்தோம்.

சிறிய குடும்பம் ஒன்று கணவன் மனைவி குழந்தை ஒன்று அவ்வீட்டில் வசிக்கின்றார்கள். பின்புறமுள்ள திறந்த சமையலறையைக் காட்டினார்கள். இரு விறகு அடுப்புக்கள் கட்டி வைத்திருக்கின்றார்கள். ஒரு பரணில் சட்டி பானைகள் அடுக்கி வைத்திருந்தார்கள்.

கறிவேப்பிலை மரம் சமையலறை அருகே செழித்து வளர்ந்து  நிற்கின்றது.
ஓர் சில கோழிகளும் நாய் ஒன்றும் அவர்களுடன் சிறு தீவைப் பகிர்ந்து கொள்கின்றன.

குழாய் மூலம் கொட்டிலுக்கு அருகே ஒரு இடத்தில் மட்டும்  தண்ணீர் வருகின்றது.

வெளி நாட்டுக் குடும்பம் ஒன்று எங்களுக்கு முன்பே இங்கு பார்க்க வந்திருந்தார்கள்.

பல அரிய காட்சிகளையும், பல உல்லாசப் பயணிகள் படகில் செல்வதையும் ஓடும் கங்கை ஆற்றில் பயணித்தபடியே கண்டுகளித்து வந்தோம்.

அவ்வூர் குடும்பம் ஒன்று ஆற்றில் பயணித்து செல்கின்றது. பெண் ஒருவர் குழந்தைக்கு வெயில் சுடாதபடி குடை ஒன்றைப் பிடித்தபடி வள்ளத்தில் அமர்ந்திருக்கின்றார். ஒருவர் படகை ஓட்டுகின்றார். தூரத்தே இருந்து பார்ப்பதற்கு மிகவும் அழகாக இருந்தது.

நன்றி:- புகைப்படங்கள் கூகிளார் உதவியில் இணையம்

-: மாதேவி :-

கொழும்பில் கம்பீரத்துடன் எழுந்து நிற்கும் வஜிராப் பிள்ளையார்

இலங்கையில் வரலாற்றுப் புகழ் மிக்க தலங்கள் பல உண்டு. தலைநகர் கொழும்புவிலும் பல கோயில்கள் இருக்கின்றன.

வஜிரா பிள்ளையார் ஆலயம் பம்பலப்பிட்டியில் அமைந்துள்ளது. இப்பொழுது புணருத்தாரண வேலைகள் நடைபெறுகின்றன.

புதிய ஐந்து நிலைக் கோபுரம் கண்கவர் வர்ணங்களுடன் ஏற்கனவே எழுந்து நிற்கிறது.

இலங்கையின பாடல்பெற்ற சில தலங்கள் பற்றிப் பார்ப்போம்.

திருகோணமலையில் அமைந்துள்ள திருக்கோணேஸ்வரம் திருஞானசம்பந்தரால் பாடப்பட்ட தலமாகும். "தாயினும் நல்ல தலைவனென்றடியார்.... எனத் தொடங்கி  கோயிலும் சுனையும் கடலுடன் சூழ்ந்த கோணமாமலை அமர்ந்தாரே" எனப் பாடி முடித்துள்ளார்.

மன்னாரை அண்டிய மாதோட்டத்தில் திருக்கேதீஸ்வரம் கேது பூசித்ததால் இப்பெயர் வந்தது எனவும் கொள்கிறார்கள். இத் தலத்தைப் போற்றி சுந்தரமூர்த்தி நாயனாரும், திருஞான சம்பந்தரும் பாடியுள்ளார்கள். 'நத்தார் படை ஞானன்......செத்தார் எலும்பணிவான் திருக்கேதீச்சரத்தானே.' என முடித்துள்ளார்.

வடபகுதியில் கீரிமலையில் அமைந்துள்ள நகுலேஸ்வரம். இதுவும் பாடல் பெற்ற தலமாகும்.

மேற் கூறிய மூன்று ஆலயங்களுடன் திருத்தம்பலேஸ்வரம், முன்னேஸ்வரம் என ஐம்பெரும் சிவஸ்தலங்கள் பிரசித்தமானவை.

தலைநகர் கொழும்புவில் பொன்னம்பலவாணேசர் கோயில் விஜயநகர் கட்டடக்கலையைத் தழுவி கருங்கல்லால் கட்டப்பட்டுள்ளது. 

மயூரபதி அம்மன் ஆலயம், தெகிவளை விஷ்ணு கோயில், பம்பலப்பிட்டி மாணிக்கப் பிள்ளையார், பம்பலப்பிட்டி கதிரேசன் கோயில்,  என மேலும் பல பிரசித்தி பெற்று விளங்குகின்றன.

தென்னிலங்கையில் கதிர்காமக் கந்தன் புகழ் பெற்ற தலம். முருகன் வள்ளி நாயகியை திருமணம் செய்த தலமாகவும் கூறுகிறார்கள். அருணகிரிநாதரால் பாடல் பெற்ற தலம்.

யாழ் நல்லூரில் அமைந்துள்ள நல்லூர் கந்தன், தொண்டைமானாறு செல்வச் சந்நிதி முருகன் என பற்பல கோயில்கள் சிறப்புப் பெற்று விளங்குகின்றன.

விநாய வணக்கம் பண்டு தொட்டே மேற்கொள்ளப்பட்டு வருகின்றது. சங்க கால இலக்கியங்களில் விநாயகர் பற்றிய குறிப்புகள் இல்லை. பல்லவர்கால சிற்பங்களில் முதல் முதலாக விநாயகர் புடைச் சிற்பமாகக் காணப்படுகிறார்.
பிற்கால சோழர் காலத்திலும் பல விநாயக சிலைகள் கோயில்களில் அமைக்கப்பட்டன. திருஞான சம்பந்தர்  'பிடியதன் உருவுமை.... என விநாயகரை தொழுது பாடியுள்ளார்.

இறை வணக்கத்தில் முதலில் விநாயகரை வணங்கிய பின்பே ஏனைய கடவுளரை வணங்குவார்கள். பிள்ளையாரை சந்தணம், சாணியில் பிடித்து வைத்து வணங்கும் வழக்கமும் இருக்கின்றது.

Thanks:- http://paravaigal.wordpress.com

மார்கழிமாதத்தில் அதிகாலையில் முற்றத்தில் கோலமிட்டு சாணிப்பிள்ளையார் பிடித்து வைத்து பூசணிப்பூ,பீர்க்கம் பூவைத்து வணங்குவார்கள். சாணிப்பிள்ளையாரை எடுத்துச்சென்று கடல்,ஆறுகளில் விடுவார்கள்.

அறுகம் புல், எருக்கலை, தும்பை, கொன்றை விநாயகருக்கு அர்ச்சிக்கும் பூக்களில் சிறப்புப் பெறுகின்றது. ஆவணிமாதத்தில் வரும் விநாயகர் சதுர்த்தி விநாயக விரதங்களில் முக்கியத்துவம் வாய்ந்தது. திருவெம்பாவைக்கு முன் விநாயகர் கதை விநாயக புராணம் 21 நாட்கள் விரதம் இருந்து படிப்பார்கள். ஊருக்கு ஊர் ஆலமரம் அரச மரங்கள் ஆற்றங்கரைகளில் அமர்ந்திருந்து மக்களைக் காப்பவரும் இவர்தான்.

பிள்ளையாருக்கு மிகவும் பிடித்தது மோதகம் எள்ளுருண்டை, அப்பம் அவல், கரும்பு,

நன்றி :- vadaliyooraan.blogspot.com

பம்பலப்பிட்டியில் காலி வீதியை ஒட்டி மேற்குத் திசையை நோக்கியபடி அமைந்துள்ளது வஜிராப் பிள்ளையார் ஆலயம். இப்பொழுது புனருத்தாரண வேலைகள் நடைபெறுவதால்

மூலஸ்தான விநாயகரை அருகே இருக்கும் சிறிய மண்டப்தில் தற்காலிகமாக வைத்து பூஜைகள்  செய்து வழிபட்டு வருகின்றார்கள்.

புதிய ஐந்து நிலைக் கோபுரத்தில் புராணக் கதைகளைக் கூறும் தெய்வச் சிற்பங்கள் அமைக்கப்பட்டுள்ளன. கோபுரத்தைச் சுற்றிலும் வெளிப் பிரகார மதிற்சுவர்களின் மேல் விநாயகரின் பல்வேறு உருவங்கள் செதுக்கி வைக்கப்பட்டுள்ளன.

கோயிலின் உட்புறம் சென்று பார்க்கலாமா எனக்கேட்டோம் ஆம் என அனுமதி கிடைத்தது. சிறிது திறந்திருந்த கோயிலின் பெரிய கதவினூடாக உள்ளே சென்றோம்.

கோயிலின் உட்பிரகார மேற்குப் பக்க சுவர்களில் சிவ தாண்டவ நடனங்கள் செதுக்கி வைக்கப்பட்டுள்ளன.

ஒரே நிலையில்  பிள்ளையார், சிவன் பார்வதி, முருகன் ஸ்தானங்கள் அமைக்கபட்டுள்ளன.

வடக்குச் சுவர்களில் முருகனின் ஆறுபடை வீடுகளும்

அம்மனின் பல்வேறு திருவுருவங்களும் அமைக்கப்பட்டுள்ளன.

மூலஸ்தானத்தைச் சுற்றி வந்தால் பின்புறம்  தீர்த்தக் குளம் அமைக்கப்பட்டுள்ளது.

குளத்தின் பின்புறம் முருகன் சிவன் அம்மனுக்கு ஸ்தானங்கள் அமைக்கப்பட்டு வருகின்றன.

கிழக்குப்புற வீதியி;ல் பல சிவலிங்கங்களும் நந்திகளும் செய்யப்பட்டுக் கொண்டிருக்கின்றன.

அவற்றைச் சுற்றி வந்தால் யாக குண்டல மண்டபம் அமைந்திருப்பதைக் காணலாம்.

அவற்றையும் கடந்து வந்தால் சமய குரவர்கள் மண்டபம் கட்டப்பட்டுக் கொண்டிருக்கிறது.

இன்னும் கட்டுமானப் பணிகள் நடைபெற்றுக் கொண்டிருக்கின்றன.

கோயில் வெளிவீதியில் நேர்த்திக் கடனாக நேர்ந்து விடப்பட்ட பசுக்களை தென்னந்தோப்பு நிழலில் கொட்டில்கள் அமைத்துப் பராமரித்து வருகின்றார்கள்.

கோமாதா எங்கள் குலமாதா  பசி தீர்க்க ஒரு கட்டுப் புல்லை கோயில் கடையில் வாங்கி கொடுத்து மகிழ்ந்தோம்.

அம்மா என்குது கன்றுக் குட்டி.

புறாக் கூட்டத்தாருக்கு வீட்டில் இருந்து ஒரு பையில் அரிசி எடுத்துச் சென்றோம்.

சிட்டுக்களுடன் சிட்டாக சிட்டுக்களும் மகிழ்கின்றன.

கூட்டத்திலே வெள்ளைப் புறா ஒன்று.

அபிஷேகத்திற்கு இளநீர், பால், பழம், கற்பூரம் ஊதுபத்தி வாங்கிக் கொடுத்து கண்குளிர அபிஷேகம் பூசைகள் கண்டு வணங்கி வந்தோம்.

சீரடி பாபாவும் ஒருபுறம் வீற்றிருக்கிறார். வியாழக் கிழமை மாலைகளில் பஜனை நடைபெறுகின்றது.

தற்காலிகமாக அமர்ந்துள்ள விநாயகருக்கு எதிர்புறம் உள்ள கட்டிடத்தில்

விஷ்ணுவும் வீற்றிருக்கின்றார்.

ஆஞ்சநேயரும் வணங்கி நிற்கின்றார்.

நரஸிம்கமுர்த்தியும் கோபாவேசத்துடன் அருள்கின்றார். அவர் கோபம் தணிய வணங்கி விடை பெற்றோம்.

மாதேவி