மாது கங்கையில் Madu ganga படகுச் சுற்றுலா

கொழும்பு காலி பிரதான வீதியில் பலப்பிட்டிய அமைந்திருக்கிறது. இங்குதான் இந் நதி ஓடிக் கடலுடன் கலக்கிறது.

Ahungalle அப்பால் அடர்ந்த காட்டின் ஊடாக மாது கங்கை பாய்கிறது. இலங்கையின் இரண்டாவது பெரிய ஈர நிலமாக இருக்கிறது.

கீரிப் பிள்ளை இனங்கள், 303 வரையான தாவர இனங்கள் இங்கு உள்ளதாகச் சொல்கிறார்கள். இவை 95 குடும்ப வகைகளைச் சார்ந்தவையாகும். 248 வகையான முதுகெலும்புடைய விலங்குகள் உள்ளனவாம்.

மீன் பிடிக் குடும்பங்களே பெரும்பாலும் வாழ்கின்றனர். ஆற்றில் மீன் இறால் பிடிப்பதையும் இரசித்துப் பார்க்கலாம்.

புதிய வகை இனங்களான நண்டு, மீன், இறால் இனங்கள் இங்கு இருக்கின்றன.

வெளிநாட்டினர் மிகவும் விரும்பி சுற்றுலா செல்லும் இடம் என்பதால் பல ஆடம்பர ஹோட்டல்கள் கங்கைக்கு அருகில் இருக்கின்றன.

கொழும்பிலிருந்து 75 கிலோ மீற்றர் தூரத்தில் இவ்விடம் உள்ளது. 2.45 மணிநேரத்தில் சென்றடையலாம்.  

மோட்டார் படகுகளில் நதியில் சவாரி சென்று பல அற்புதமான காட்சிகளைக் காணலாம். உல்லாசப் பயணிகளின் பரடைஸ் எனவும் அழைக்கிறார்கள். இரண்டு கிலோ மீற்றர் வரை படகில் சென்று இன்புற்று வரலாம். சுற்றிவர 25-30 தீவுகள் இருக்கின்றன. ஆழமற்ற ஆறு.  ஆழமான இடத்தில் 3 மீற்றர் தாளம் இருக்குமாம்.

நாங்கள் மோட்டார் படகு ஒன்றில் ஏறி ஆற்றில் பயணித்தோம்.
வெள்ளை நிறப் பறவைகள் சிறிய மரங்களில் கூட்டமாகக் கூடியிருந்து மகிழ்கின்றன. செட்டையடித்துப் பறந்து திரிந்து எம்மையும் மகிழ்வித்தன. பாலத்தின் கீழாக பயணித்தோம்.

 

பாம்புத் தீவு, ஐந்து சதத் தீவு (Satha pahe Dupatha>) பன்சலத் தீவு, நய் தீவு எனச் சில தீவுகளுக்கு பெயர்களும் உள்ளன. சத பக துவா மிகவும் சிறிய தீவு. பழைய காலத்தில் 5 சதத்திற்கு வாங்கியதாக வாய் மொழிக் கதைகள் உள்ளன. சிலர் நாணய வடிவில் இருப்பதால் அவ்வாறு அழைக்கப்படுகிறது என்கிறார்கள்.

இரண்டு முக்கிய தீவுகளில் நைடுவ Nai Duwa, மாடுவா பெரிய தீவு. இது 562 மீற்றர் நீளம் கொண்ட தீவு. தீவுகளின் கரையோரங்களில் செழித்து வளர்ந்திருக்கும் சதுப்பு நிலமரங்கள் நீர் அரிப்பினால் தீவுகள் அழியாமல் பாதுகாக்கின்றன.

Maduganga Kotdoowa Rajamaha Viharaya

தேவாலயத் தீவு 800 ஆண்டுகள் பழமையானது. கோத்டுவா ராஜமஹா விகாரை இந்த கங்காவில் அமைந்துள்ளது.

ஐந்து சததீவைத்தாண்டிப் பயணித்தோம். மிகவும் சிறிய தீவு கல்லாலான சிறிய ஒரு கட்டடம்  இருக்கின்றது. மரம் ஒன்று பரந்து விரிந்து கிளைகள் பரப்பி நிற்கின்றது அழகாக இருந்தது.

நீர்ப் பாம்பு ஒன்று நீரின் மேல் ஓடித் திரிந்து பயங்காட்டியது. இவற்றையெல்லாம் இரசித்த படியே படகில் சவாரி செய்கின்றோம். பாலத்தின் கீழால் படகு செல்கிறது.

இருபறமும் அடர்ந்த மரங்கள் வளர்ந்து நிற்க கிளைகளுக்குக் கீழாக பயணித்துச் செல்வது சொல்ல முடியாத இனிய அனுபவத்தை தந்தது.

இடையே திகில் பயணமும் தொடர்கின்றது. நீரில் கபரகொயாக்களும் ஓடித் திரிந்து பயங் காட்டின.

விகாரை தூரத்தே அழகாகக் காட்சி தருகின்றது. படகில் தொடர்ந்து விகாரையைத்தாண்டிப் பயணித்தோம்.

உயரமான மேடுகளில் வீடுகள் அமைத்து மக்கள் வசிக்கிறார்கள். பொதுவாக தனித்தனி வீடுகளாகவே இருப்பதைக் கண்டோம். உயரக் குன்றில் அமைந்துள்ள கறுவாப் பயிரிடப்பட்டிருந்த வீட்டிற்கு படகை செலுத்து நிறுத்தினார்கள்.

படகிலிருந்து மகிழ்ச்சியாக இறங்கினோம். மேட்டில் அழைத்துச் செல்லப்பட்டோம். கறுவா மரங்களினூடாக ஒற்றை அடிப்பாதையில் ஏறிச் சென்றோம்.


நாங்கள் சென்று பார்த்த வீடும் தனித்திருந்தது. வீட்டைச் சுற்றிலும் நீர் ஓடிக் கொண்டிருக்கிறது. அடுத்த வீட்டுக்குச் செல்வதாக இருந்தாலும் படகை வலித்தே செல்லவேண்டும். பக்கத்து வீட்டார் தொல்லையிலிருந்து விடுதலை நேரம் கெட்ட வேளை அழைப்பு மணிகேட்காது.

ஓவ்வொரு வீட்டிலும் ஒரு படகு வைத்துள்ளார்கள். தாங்களே வலித்துச் சென்று மாதாந்திரத்திற்கு தேவையான பொருட்களை வாங்கி வருவதாகச் சொன்னார்கள்.

குடிசை வீடுதான். ஒரு கொட்டிலும் ஒரு அறையும் சாய்வாகத் திறந்த சமையலறையும் இருந்தது.

கொட்டிலில்; வெட்டிய கறுவா மரங்களை பரப்பி வைத்திருந்தார்கள் கத்தியால் கீறிக் காட்டினார்கள். வெயிலில் காய வைத்த துண்டங்கள் காயக்காய சுருண்டு வரும். ஓரளவு காய்ந்த துண்டங்களை கொட்டில் கூரையில் மேலே செருகி வைத்து நன்கு காயவிட்டிருப்பதைக் கண்டோம்.
கறுவா மரங்களையும் சென்று காட்டினார்கள். விற்பனைக்கு பைக்கற்களில் கறுவாக்களை வைத்திருந்தார்கள். கறுவாப் பொடியும், கறுவா எண்ணெயும் கிடைக்கின்றன. நாங்களும் இரண்டு இரண்டு பைக்கற்றுகள் வாங்கி வந்தோம்.

சிறிய குடும்பம் ஒன்று கணவன் மனைவி குழந்தை ஒன்று அவ்வீட்டில் வசிக்கின்றார்கள். பின்புறமுள்ள திறந்த சமையலறையைக் காட்டினார்கள். இரு விறகு அடுப்புக்கள் கட்டி வைத்திருக்கின்றார்கள். ஒரு பரணில் சட்டி பானைகள் அடுக்கி வைத்திருந்தார்கள்.

கறிவேப்பிலை மரம் சமையலறை அருகே செழித்து வளர்ந்து  நிற்கின்றது.
ஓர் சில கோழிகளும் நாய் ஒன்றும் அவர்களுடன் சிறு தீவைப் பகிர்ந்து கொள்கின்றன.

குழாய் மூலம் கொட்டிலுக்கு அருகே ஒரு இடத்தில் மட்டும்  தண்ணீர் வருகின்றது.

வெளி நாட்டுக் குடும்பம் ஒன்று எங்களுக்கு முன்பே இங்கு பார்க்க வந்திருந்தார்கள்.

பல அரிய காட்சிகளையும், பல உல்லாசப் பயணிகள் படகில் செல்வதையும் ஓடும் கங்கை ஆற்றில் பயணித்தபடியே கண்டுகளித்து வந்தோம்.

அவ்வூர் குடும்பம் ஒன்று ஆற்றில் பயணித்து செல்கின்றது. பெண் ஒருவர் குழந்தைக்கு வெயில் சுடாதபடி குடை ஒன்றைப் பிடித்தபடி வள்ளத்தில் அமர்ந்திருக்கின்றார். ஒருவர் படகை ஓட்டுகின்றார். தூரத்தே இருந்து பார்ப்பதற்கு மிகவும் அழகாக இருந்தது.

நன்றி:- புகைப்படங்கள் கூகிளார் உதவியில் இணையம்

-: மாதேவி :-

கொழும்பில் கம்பீரத்துடன் எழுந்து நிற்கும் வஜிராப் பிள்ளையார்

இலங்கையில் வரலாற்றுப் புகழ் மிக்க தலங்கள் பல உண்டு. தலைநகர் கொழும்புவிலும் பல கோயில்கள் இருக்கின்றன.

வஜிரா பிள்ளையார் ஆலயம் பம்பலப்பிட்டியில் அமைந்துள்ளது. இப்பொழுது புணருத்தாரண வேலைகள் நடைபெறுகின்றன.

புதிய ஐந்து நிலைக் கோபுரம் கண்கவர் வர்ணங்களுடன் ஏற்கனவே எழுந்து நிற்கிறது.

இலங்கையின பாடல்பெற்ற சில தலங்கள் பற்றிப் பார்ப்போம்.

திருகோணமலையில் அமைந்துள்ள திருக்கோணேஸ்வரம் திருஞானசம்பந்தரால் பாடப்பட்ட தலமாகும். "தாயினும் நல்ல தலைவனென்றடியார்.... எனத் தொடங்கி  கோயிலும் சுனையும் கடலுடன் சூழ்ந்த கோணமாமலை அமர்ந்தாரே" எனப் பாடி முடித்துள்ளார்.

மன்னாரை அண்டிய மாதோட்டத்தில் திருக்கேதீஸ்வரம் கேது பூசித்ததால் இப்பெயர் வந்தது எனவும் கொள்கிறார்கள். இத் தலத்தைப் போற்றி சுந்தரமூர்த்தி நாயனாரும், திருஞான சம்பந்தரும் பாடியுள்ளார்கள். 'நத்தார் படை ஞானன்......செத்தார் எலும்பணிவான் திருக்கேதீச்சரத்தானே.' என முடித்துள்ளார்.

வடபகுதியில் கீரிமலையில் அமைந்துள்ள நகுலேஸ்வரம். இதுவும் பாடல் பெற்ற தலமாகும்.

மேற் கூறிய மூன்று ஆலயங்களுடன் திருத்தம்பலேஸ்வரம், முன்னேஸ்வரம் என ஐம்பெரும் சிவஸ்தலங்கள் பிரசித்தமானவை.

தலைநகர் கொழும்புவில் பொன்னம்பலவாணேசர் கோயில் விஜயநகர் கட்டடக்கலையைத் தழுவி கருங்கல்லால் கட்டப்பட்டுள்ளது. 

மயூரபதி அம்மன் ஆலயம், தெகிவளை விஷ்ணு கோயில், பம்பலப்பிட்டி மாணிக்கப் பிள்ளையார், பம்பலப்பிட்டி கதிரேசன் கோயில்,  என மேலும் பல பிரசித்தி பெற்று விளங்குகின்றன.

தென்னிலங்கையில் கதிர்காமக் கந்தன் புகழ் பெற்ற தலம். முருகன் வள்ளி நாயகியை திருமணம் செய்த தலமாகவும் கூறுகிறார்கள். அருணகிரிநாதரால் பாடல் பெற்ற தலம்.

யாழ் நல்லூரில் அமைந்துள்ள நல்லூர் கந்தன், தொண்டைமானாறு செல்வச் சந்நிதி முருகன் என பற்பல கோயில்கள் சிறப்புப் பெற்று விளங்குகின்றன.

விநாய வணக்கம் பண்டு தொட்டே மேற்கொள்ளப்பட்டு வருகின்றது. சங்க கால இலக்கியங்களில் விநாயகர் பற்றிய குறிப்புகள் இல்லை. பல்லவர்கால சிற்பங்களில் முதல் முதலாக விநாயகர் புடைச் சிற்பமாகக் காணப்படுகிறார்.
பிற்கால சோழர் காலத்திலும் பல விநாயக சிலைகள் கோயில்களில் அமைக்கப்பட்டன. திருஞான சம்பந்தர்  'பிடியதன் உருவுமை.... என விநாயகரை தொழுது பாடியுள்ளார்.

இறை வணக்கத்தில் முதலில் விநாயகரை வணங்கிய பின்பே ஏனைய கடவுளரை வணங்குவார்கள். பிள்ளையாரை சந்தணம், சாணியில் பிடித்து வைத்து வணங்கும் வழக்கமும் இருக்கின்றது.

Thanks:- http://paravaigal.wordpress.com

மார்கழிமாதத்தில் அதிகாலையில் முற்றத்தில் கோலமிட்டு சாணிப்பிள்ளையார் பிடித்து வைத்து பூசணிப்பூ,பீர்க்கம் பூவைத்து வணங்குவார்கள். சாணிப்பிள்ளையாரை எடுத்துச்சென்று கடல்,ஆறுகளில் விடுவார்கள்.

அறுகம் புல், எருக்கலை, தும்பை, கொன்றை விநாயகருக்கு அர்ச்சிக்கும் பூக்களில் சிறப்புப் பெறுகின்றது. ஆவணிமாதத்தில் வரும் விநாயகர் சதுர்த்தி விநாயக விரதங்களில் முக்கியத்துவம் வாய்ந்தது. திருவெம்பாவைக்கு முன் விநாயகர் கதை விநாயக புராணம் 21 நாட்கள் விரதம் இருந்து படிப்பார்கள். ஊருக்கு ஊர் ஆலமரம் அரச மரங்கள் ஆற்றங்கரைகளில் அமர்ந்திருந்து மக்களைக் காப்பவரும் இவர்தான்.

பிள்ளையாருக்கு மிகவும் பிடித்தது மோதகம் எள்ளுருண்டை, அப்பம் அவல், கரும்பு,

நன்றி :- vadaliyooraan.blogspot.com

பம்பலப்பிட்டியில் காலி வீதியை ஒட்டி மேற்குத் திசையை நோக்கியபடி அமைந்துள்ளது வஜிராப் பிள்ளையார் ஆலயம். இப்பொழுது புனருத்தாரண வேலைகள் நடைபெறுவதால்

மூலஸ்தான விநாயகரை அருகே இருக்கும் சிறிய மண்டப்தில் தற்காலிகமாக வைத்து பூஜைகள்  செய்து வழிபட்டு வருகின்றார்கள்.

புதிய ஐந்து நிலைக் கோபுரத்தில் புராணக் கதைகளைக் கூறும் தெய்வச் சிற்பங்கள் அமைக்கப்பட்டுள்ளன. கோபுரத்தைச் சுற்றிலும் வெளிப் பிரகார மதிற்சுவர்களின் மேல் விநாயகரின் பல்வேறு உருவங்கள் செதுக்கி வைக்கப்பட்டுள்ளன.

கோயிலின் உட்புறம் சென்று பார்க்கலாமா எனக்கேட்டோம் ஆம் என அனுமதி கிடைத்தது. சிறிது திறந்திருந்த கோயிலின் பெரிய கதவினூடாக உள்ளே சென்றோம்.

கோயிலின் உட்பிரகார மேற்குப் பக்க சுவர்களில் சிவ தாண்டவ நடனங்கள் செதுக்கி வைக்கப்பட்டுள்ளன.

ஒரே நிலையில்  பிள்ளையார், சிவன் பார்வதி, முருகன் ஸ்தானங்கள் அமைக்கபட்டுள்ளன.

வடக்குச் சுவர்களில் முருகனின் ஆறுபடை வீடுகளும்

அம்மனின் பல்வேறு திருவுருவங்களும் அமைக்கப்பட்டுள்ளன.

மூலஸ்தானத்தைச் சுற்றி வந்தால் பின்புறம்  தீர்த்தக் குளம் அமைக்கப்பட்டுள்ளது.

குளத்தின் பின்புறம் முருகன் சிவன் அம்மனுக்கு ஸ்தானங்கள் அமைக்கப்பட்டு வருகின்றன.

கிழக்குப்புற வீதியி;ல் பல சிவலிங்கங்களும் நந்திகளும் செய்யப்பட்டுக் கொண்டிருக்கின்றன.

அவற்றைச் சுற்றி வந்தால் யாக குண்டல மண்டபம் அமைந்திருப்பதைக் காணலாம்.

அவற்றையும் கடந்து வந்தால் சமய குரவர்கள் மண்டபம் கட்டப்பட்டுக் கொண்டிருக்கிறது.

இன்னும் கட்டுமானப் பணிகள் நடைபெற்றுக் கொண்டிருக்கின்றன.

கோயில் வெளிவீதியில் நேர்த்திக் கடனாக நேர்ந்து விடப்பட்ட பசுக்களை தென்னந்தோப்பு நிழலில் கொட்டில்கள் அமைத்துப் பராமரித்து வருகின்றார்கள்.

கோமாதா எங்கள் குலமாதா  பசி தீர்க்க ஒரு கட்டுப் புல்லை கோயில் கடையில் வாங்கி கொடுத்து மகிழ்ந்தோம்.

அம்மா என்குது கன்றுக் குட்டி.

புறாக் கூட்டத்தாருக்கு வீட்டில் இருந்து ஒரு பையில் அரிசி எடுத்துச் சென்றோம்.

சிட்டுக்களுடன் சிட்டாக சிட்டுக்களும் மகிழ்கின்றன.

கூட்டத்திலே வெள்ளைப் புறா ஒன்று.

அபிஷேகத்திற்கு இளநீர், பால், பழம், கற்பூரம் ஊதுபத்தி வாங்கிக் கொடுத்து கண்குளிர அபிஷேகம் பூசைகள் கண்டு வணங்கி வந்தோம்.

சீரடி பாபாவும் ஒருபுறம் வீற்றிருக்கிறார். வியாழக் கிழமை மாலைகளில் பஜனை நடைபெறுகின்றது.

தற்காலிகமாக அமர்ந்துள்ள விநாயகருக்கு எதிர்புறம் உள்ள கட்டிடத்தில்

விஷ்ணுவும் வீற்றிருக்கின்றார்.

ஆஞ்சநேயரும் வணங்கி நிற்கின்றார்.

நரஸிம்கமுர்த்தியும் கோபாவேசத்துடன் அருள்கின்றார். அவர் கோபம் தணிய வணங்கி விடை பெற்றோம்.

மாதேவி

காற்று வாங்க காலாற மனம் சிறகடிக்க ஹோல்பேஸ் கடற்கரை

கொழும்பு நகரின் முகமாக இருக்கும் அழகிய கடலை ஒட்டிய பரந்த பிரதேசம் கோல்பேஸ் கடற்கரை. காலிமுகத்திடல் என தமிழில் அழகாக அழைக்கப்படுகிறது.

இங்கு Galle Face Hotel காலிமுகத் திடலைப் பார்த்துக் கம்பீரமாக நிற்கிறது.
1864ல் கட்டப்பட்ட இது சுவஸ் (Suez) கால்வாய்க்குக் கிழக்குப்புறமுள்ள மிகப் பழமை வாய்ந்த ஹொட்டேல் என்ற புகழ் பெற்றது.

One of the "1000 Places to See Before You Die" என்ற பட்டியலில் அடங்குகிறது.

காலிமுகத்திடல் வரலாற்றில் முக்கியத்துவம் பெற்ற இடமுமாகும். இங்கு பல அரசியல் கூட்டங்களும்,  ஊர்வலங்களும்,  நடை பெற்றிருக்கின்றன. விழாக்கால இசை நிகழ்ச்சிகளுக்கும் குறைவில்லை.

விடுமுறை நாட்களில் மாலையின் இனிய சூழலில் பெருந்திரளாக மக்கள் உல்லாசமாக இக் கடற்கரைக்கு வருகிறார்கள். சுகம் தரும் கடற்காற்றைச் சுவாசித்து இன்புற்றுக் களிக்கிறார்கள். அவசர யுகம் இது. சிறிய கூடுகளான வீடுகளில் வாழ்க்கை. நடந்து உலாவுவதற்கு இடமில்லாதவர்களுக்கு  காலாறவும், மனத்திற்கு புத்துணர்ச்சி ஏற்படுத்தவும் ஏற்ற இடமாக இருக்கிறது.

 குழந்தைகள் விளையாட என இங்கு கூடுகிறார்கள்.

குழந்தைகள் கடலலைகளில் கால் நனைத்து விளையாடும் காட்சிகள் மனதுக்கு இதமளிக்கின்றன.

குழந்தைகளுடன் கொக்குகள், குருவிகள் எனப் பறந்து திரிகின்றன. பறக்க முடியாத பாம்புகள் கூட நீல வானிலே சுழன்றாடுகின்றன.

கொப்ரா பறந்து திரிகிறது பாருங்கள்.

கொக்கைப் பிடிக்க பாம்பு முயல்கிறது. கொக்கோ அதியுயர பறந்து சென்று பாம்பாரைப் பார்த்துச் சிரிக்கின்றது. பாம்பாரை விரட்டும் பருந்து என போட்டா போட்டி நடக்கின்றது.

கடற்கரை ஓரம் தென்னை பனை மரங்கள் வளர்த்து இயற்கையை உருவாக்க முயல்கிறார்கள். தென்னை மரங்கள் குரும்பை காய் என குலை தள்ளி நிற்கின்றன.

கடற்கரைக்குச் சென்றால் கொறிப்பதற்கு மீனுணவு வேண்டாமா? பொரித்த நண்டு, இஸ்சோ வடை கண்ணாடிப் பெட்டிகளுள் எண்ணெயில் பொரிந்து நின்று யார் வாயில் புகுவோமோ எனக் காத்திருக்கினறன.

ஐஸ் கிறீம் வண்டிகள், சிப்ஸ், மிளகாய் உப்பிட்ட மாங்காய்த் துண்டங்கள், அம்பரல்லா, வெரளு அன்னாசி, என காரப் புளிப்புடன் நாவுக்குச் சுவையாக சுவைத்துக் கொண்டே காலாற நடக்கின்றார்கள் சிலர்.

காண்ணாடிப் பெட்டிகளுள் உள்ள காய்களை படம் எடுக்க முயல விற்பனைப் பெண்மணி உசாராகிவிட்டார். அதனால் படம் இல்லை.

கலர் கலராகப் பந்துகள் விளையாடக் காத்திருக்கின்றன. பாருங்கள் எவ்வளவு அழகு. நீங்களும் ஒன்றை எடுத்துக்கொள்ளுங்கள்.

குழந்தைகளின் பெற்றோருக்கு பர்ஸ்சுகள் காலியாகிக் கொண்டிருந்தன.

குரங்காட்டியும் தன் பங்கிற்கு குழந்தைகளுக்கு விளையாட்டுக் காட்ட வந்திருந்தார். பாவம் குரங்கார் கடல்பார்த்து மகிழ்வோம் என வந்தவர் மாட்டிக்கொண்டார். 

கடலினுள் சிறிய பாலம் அமைத்துள்ளார்கள். உள்ளே ஒரு மேடை.  சில படிகள் ஏறி பாலத்தினுள் ஏறிச் சென்று கடலினுள்ளிருந்து கரையையும் அடித்துச் செல்லும் கடலலைகளையும் கண்டு களிக்கலாம்.

கொழும்புத் துறைமுகத்தில் புதிதாக கட்டப்படும் இறங்குதுறையும், அங்கு கப்பல் தரித்து நிற்பதும், நீர் வானவில் போல மேலெழுந்து   பாய்வதும் மங்கலாகத் தெரிகின்றன.

அங்கிருந்து கொழும்பு நகரின் ஒரு பகுதியை நடுக்கடலிலுள்ள கப்பலில் நின்று கொண்டு பார்ப்பது போன்ற உணர்வுடன் பார்த்து மகிழலாம்.

காலிமுகத் திடலின் எதிர்ப்புறம் ரான்ஸ் ஏசியா ஹோட்டேல். இங்கு நடக்கும் காட்சிகளைப் பார்த்து ரசித்தபடியே மௌனமாக நிற்கிறது. தூரத்தே உயர்ந்து நிற்பது Cinnamon Grand Hotel. மற்றொன்று புதிதாக எழுந்து கொண்டிருப்பதையும் காணலாம்.

இன்னும் காலிவீதியை அண்டியபடி  சிலோன் கொன்டினென்டல் ஹோட்டேல், ருவின் ரவர், கலதாரி ஹோட்டல், பழைய பாராளுமன்றக் கட்டிடம் என கொழும்பின் பாரிய மற்றும் பாரம்பரிய கட்டிடங்கள் நிமிர்ந்து நிற்பதைக் காணலாம். கலதாரி ஹோட்டலுக்குப் பின்னே  Bank of Ceylon கட்டடம் BOC என முடிசூடி நிற்பது தெரிகிறது.

இலங்கைக்கு வரும் உல்லாசப் பயணிகள் தங்கும் உயர்தர வர்க்கத்தினரின் பாரம்பரிய ஹோட்டலாக இருப்பது கடலை ஒட்டி அமைந்துள்ள கோல்பேஸ் ஹொட்டேல். அதன் வெளிப்புறம் திறந்த வெளியில். வெளி மக்களும் சாப்பிட வசதி செய்துள்ளார்கள்.விலை சற்று அதிகம். கடலலைகளை ரசித்தபடியே இருந்து கொண்டு உணவு அருந்தலாம்.

உல்லாசப் பயணிகள் இருவர் கடற்காற்று வாங்குகிறார்கள்.

காலையில் ஏற்றப்படும் தேசியக் கொடியை மாலை மங்கும்போது கடற்படை வீரர்கள் இறக்கும் காட்சியையும் பார்க்கக் கிடைத்தது.

மழைமேகம் இருட்டிவர சூரியனும் மறையத்தொடங்குகின்றான். 

மழைத்துளிகளுக்குப் பயந்தபடியே நாங்களும் கிறஸ்கற் Crescat Shopping centre நோக்கி  செல்கின்றோம். மூன்று மாடிக் கட்டடமான இதற்குள் நுழைந்தால் பல மணி நேரங்களுக்கு பொழுது போவதே தெரியாது.  . கொம்ளக்சில் சிறிது சொப்பிங் .பின்னர் அங்குள்ள உணவகத்தில் இரவு  உணவு முடித்துவிட்டு ஆனந்தமாக வீடுதிரும்பினோம்.

மேலும் கடற்கரை உலாக்கள்
கசூரினா கடற்கரை
மணற்காடு

:- மாதேவி -:

000.0.000